Best til nyskaping i Rogaland
Den særs ekspansive data- og konsulentbedrifta, Omega frå industribygda Ølen, er kåra til Rogalands mest nyskapande bedrift i 2012.
Av: Thomas Førde
Publisert: 15 januar 2013
Under middagen til årets Sola-konferanse blei nyskapingsprisen delt ut til gryndar og største eigar i Omega, Sigmund Lunde, og dagleg leiar Petter Aalvik.
Omega har i dag 1030 tilsette samtidig som verksemda har 200 ledige stillingar. Omega sine folk er særs etterspurte i olje- og gassindustrien kring i store delar av verda. Omega kan tilby datasystem, særleg laga for prosjektstyring. Samtidig leiger Omega ut ingeniørar og folk med røynsle frå leiing av kompliserte byggeprosjekt.
Enorm vekst
- Midt på 1990-talet kom Omega med konseptet, som har utvikla seg til ein suksess i ein krevjande, internasjonal marknad. Selskapet sin omsetnad har vakse frå knapt 100 millionar kroner i 2002 til over ein milliard i 2011. Dette er tufta på organisk vekst og ein organisasjon som er prega av engasjement for og med dyktige medarbeidarar, sa fylkesordførar Janne Johnsen, då ho delte ut prisen på vegne av Rogaland Forskning- og Nyskapingsfond.
Innovasjon frå medarbeidarane
I følgje juryen for nyskapingsprisen er dette er 11. året prisen blir delt ut til ein bedrift som har markert seg innan nyskaping, kompetanseutvikling, næringsretta forsking og regional næringsutvikling.
- Årets vinnar er ein sterk eksponent for innovasjon driven fra av medarbeidarane. . Det dreiar seg om nye produkt eller tenester, som blir til gjennom opne og inkluderande prosessar, basert på medarbeidarar sine idear, kunnskap og erfaring. Dette bidrar til den totale innovasjonsevna i verksemda, heiter det i juryen si grunngjeving.
I 15 land
Omega har i dag tilsette på oppdrag i meir enn 15 land. I Norge har verksemda avdelingar i Oslo, Bergen, Stavanger, Trondheim og Kristiansund i tillegg til hovudkontoret i Ølensvåg. Utanlands har Omega avdelingar i USA, Canada, Storbritannia, Litauen, Singapore og Australia.
Statoil og Kårstø
Datasystem og personell frå Omega i Ølensvåg er på oppdrag hos kunder som Statoil, Shell, Gassco, BP, ConocoPhillips, Aibel, Jernbaneverket, Lundin, Det norske, Odfjell, AF Gruppen og Apply Sørco.
Statoil er den klart største kunden. Landanlegg innan olje og gassindustrien kring i Norge, slike som Kårstø, Mongstad og Kollsnes, sysselset for tida flest Omega-tilsette.