Publisert: 17.01.13
Av Arne Frøkedal
Ølensvåg-bedrifta Omega AS er kåra til beste bedrift i Rogaland innan forsking og nyskaping i 2012, og går vidare til NHO sin nasjonale konkurranse.
Med 250 politikarar og næringslivstoppar til stades under det årlege Solamøtet blei Omega heidra for sin store suksess. Fylkesordførar Janne Johnsen fekk æra av å dela ut Rogaland Forskings og Nyskapingspris 2012, med velvaalte ord om Vindafjord-bedrifta.
— Midt på 90-talet kom konseptet som har utvikla seg til ein suksess i ein krevjande, internasjonal marknad. Selskapet si omsetning har auka frå knappe hundre millionar i 2002 til over éin milliard kroner i 2011. Dette er tufta på organisk vekst og ein organisasjon som er prega av engasjement for og med dyktige medarbeidarar, og som i dag tel 1.030 tilsette, sa fylkesordføraren på vegner av Rogaland Forsking- og Nyskapingsfond.
Næringshage
Dette er ellevte året prisen blir delt ut til ei bedrift som har markert seg innan nyskaping, kompetanseutvikling, næringsretta forsking og regional næringsutvikling.
Med prisen følgjer også 100.000 kroner, som i god nyskapingsånd skal gå til den nye næringshagen i Vindafjord. For snart eitt år sidan begynte Omega AS arbeidet med å etablera ein næringshage for auka verdiskaping i det lokale næringslivet og enda betre grobotn for nyetableringar i kommunen.
I tillegg til Omega, blir Westcon, Berge Sag, Ølen Betong og kommunen aksjonærar i Vindafjord Næringshage AS, eit selskap under etablering. Kontor er under oppussing i Kiwibygget i Ølensvåg og vil vera klare til bruk om rundt éin månad.
— Næringslivet i Vindafjord har hatt eit unikt samarbeid i mange år. Her er det ein vilje og eit ønske om å gjera kvarandre gode. Og ein næringshage kan vera det som skal til for at endå fleire vil våga å satsa på eigne idear i kommunen, seier Sigmund Lunde,Omega-gründer og styreleiar.
Takkar tilsette
Dagleg leiar Petter Aalvik synest det er kjekt og inspirerande å få denne prisen.
— Omega held ein låg profil, og ein pris for innovasjon og nyskaping kjennest godt. Dette vil vera positiv for heile organisasjonen vår, seier han og er spesielt glad for juryen si grunngjeving.
Her heiter det: "Årets vinnar er ein sterk eksponent for «medarbeiderdrevet innovasjon». Det dreier seg om nye produkt eller tenester som blir til gjennom opne og inkluderande prosessar, basert på medarbeidarane sine idear, kunnskap og erfaring. Dette bidrar til verksemda si totale innovasjonsevne."
— Og det er medarbeidarane som skal takkast for dette, sa Aalvik som tok imot prisen saman med Sigmund Lunde.
30 prosent vekst
Omega AS passerte den magiske grensa éin milliard i omsetning i 2011, og i fjor auka verksemda basert på programvare-tenester og personell til olje og energisektoren, ytterlegare sitt volum. Bedrifta med oppdrag i 15 land, nådde ei omsetning på rundt 1,3 milliardar kroner og tel i dag 1.035 tilsette (fem fleire enn i prisutdelar sitt manus!) – om lag 150 nye i 2012.
— Rundt 30 prosent vekst i fjor er me sjølvsagt godt tilfreds med. Eg trudde at det ville vera vanskeleg å halda fram denne utviklinga då me passerte milliarden, seier ein tilfreds dagleg leiar.
— Korleis ser 2013 ut?
— Veldig bra. Olje- og gassnæringa opplever gode prisar. Dei fleste kundane har stor aktivitet, mange prosjekt og stor investeringslyst. Me har drive eit omfattande teknologiarbeid og er nå klare med ein ny generasjon prosjektsystem som me gler oss til å visa fram i marknaden. Eg er rimeleg trygg på god vekst i Noreg. I tillegg ser me for oss vekst og god utvikling i konsulentsatsinga internasjonalt, spesielt i Australia, men også i Houston/ USA og Singapore, svarer Petter Aalvik.